HORDHAC.

Degmada Allaybaday oo aan hore u lahaan jirin Dugsi Sare ayaa laga aasaasay Sanadkii 2006da, Dugsigaasi oo ahaa mid baahi wayn ay u qabeen Dadwaynaha reer Allaybaday ayaa waxaa iska kaashaday Bilowga Dugsigaasi Qurba Jooga Degmada kasoo jeeda,Wasaarada Waxbarashada JSL, Maamulka Degmada iyo Aqoonyahanada Degmada oo dhamaantood dareemay Baahida loo qabo Dugsi Sare  una guntaday siddii loo taabo galin lahaa.

MARXALADIHII UU SOO MARAY DUGSIGA SARE WAXYAABIHII U QABSOOMAY IYO WIXII AAN U QABSOOMIN.

Marxaladihii Dugsigu soo maray waxaa ka mid ahaa   Dugsiga oo aan lahayn labadii Sanad Dugsiyeed ee lasoo dhaafay Dhisme u gaar ah balse Waxbarashadu ka socotay Dugsi H/DHEXE ee SH  Axmed Qaalib iyada oo labadaa sano dugsiyeed uu ka koobnaa hal fasal Macalimiintuna dhamayd 4 Macalin ayaa waxa sanadkii 2007da Dabayaaqadiisii La dhagax dhigay dhismihii Dugsiga sare ee ay Allayabaday abid yeelato iyada oo uu dhagax dhigay Wasiirka Wasaarada Waxbarashada JSL Mudane Xasan X Maxamuud ( X Gadhwayne)  dhismahaasi oo ka kooban 3 fasal, Xafiis iyo Istoodh.

Hadaba markii dhismaha Iskuulku dhamaaday ayaa waxa Haayadii dhistay oo ahayd DRC kala wareegay Wasaaarada Waxbarashada JSL, oo ahayd sanadkii dhamaaday ee 2008da  bishii 7 ayaa waxa xadhiga laga jiray 21 july oo ah maalinta Waxbarashada Degmada Allaybaday taasi oo uu  Xadhiga ka jaray Wasiirka Waxbarashada JSL Mudane Xasan  X Maxamuud Warsame oo ay wahelinayeen Masuuliyiin iyo Xubno kasocday UHWA oo fasax ku yimid dalka.

Hadaba sanad Dugsiyeedkan Cusub ee 2008 ilaa 2009 ayaa waxa Dugsiga kusoo biiray fasal labaad waxaana Dugsigu hada ka kooban yahay laba fasal oo ay tiradoodu dhantahay 38 Arday. waxa sidoo kale noo suuragalay in aan keeno Dugsiga Macalimiin Cusub oo daboola Xiisadaha Dugsiga si ku habooon kuwaasi oo dhan 3 Macalin iyada oo tirada Macalimiintuna hada dhan tahay 5 Macalin.

Dhinaca gunada Macalimiintu waxay ka helaan UHWA oo aan odhan karo waa udub dhexaadka Waxbarashada Degmada Maadaama oo aanay ku filayn Macalimiinta Gunada Wasaaradu.

Dhinaca agabka waxbarashada waxa gacanta ku haysa Wasaarada Waxbarashada JSL haddii ay tahay Buugaagta syllabuska Science Equipments iyo Stationerygaba, waxa xusid mudan In Iskuulka siddoo kale agab waxbarasho kasoo gaadheen Xubno ku nool  U.K kuwaasi kala ahaa C/Xakiin Sulub iyo Sandy Young oo keenay Dugsiga Sare Computers ,Xasan Mataan oo keenay photo copy, Axmed Siyaad Axmed oo keenay Science and Mathematics books iyo scientific calculators.

Dhanka kale waxyaabaha aan Dugsiga u qabsoomin waxa ka mid ah in aan Iskuulku helin Macalimiinta Masaarida ah ee Dugsiyada dalka wax ka dhiga kuwaasi oo Wasaaradu Iskuulada u qaybiso, kuwaasi oo Mushaaradooda ay Jaamacada Carabtu siiso, balse u baahda oo kaliya Guri la dajiyo  horena aan u codsanay ka Maamule ahaan in Dugsiga la keeno balse aan suuro galin, halka laga geeyay Iskuulo mar aan wada bilownay sidda Wajaale, taasi oo isla maalintii la qaybiyay Macalimiintaasi aan la xidhiidhay Madaxa Wasaarada u qaabilsan Macalimiintaasi oo aan waydiiyay sobobta macalimiintaa naloogu keeni waayay? Ayaa uu iigu jawaabay Masuulkaasi waxa la eegaayay Tirada fasalada sidaasi daraadeed idinku  ma lihidin form 2 oo waxa la rabay in uu iskuulku ka koobnaado 3 fasal, hadaba waxa xusid mudan in sanad dugiyeedkii hore ay jireen arday aan u bilownay waxbarashada oo kasoo baxday Madarasada Alfurqaan balse ayna sii socon waxbarashadii ardaydaasi sobobo jiray awgood.

Waxa kale oo ka dugsi ahaan fursad ay noo siisay Wasaarada Waxbarashadu iyada oo dareensan Baahida Macalimeed ee ka jirta Degmada siddii loo heli lahaa Macalin deegaanka u dhashay oo u tababaran Waxbarista Dugsiga sare, taasi oo ay tidhi ardaydii reer Allaybaday ee sanadkan ka baxday Dugsiyada Sare usoo dirsada arday Jaamacada Camuud kaasi bilaash kusoo baran doona 2 sano oo ah Diplom Education ah kadibna wax ka dhigi doona Dugsiga Sare ee  Allaybaday kadib markii aan fursadaasi helnay waxa aan la xidhiidhay dhamaan ardaydii sanadkan inooga baxday Dugsiyada Sare, balse Nasiib daro Maan helin cid fursadaasi ka faa’idaysata.

Waxa kale oo aan jecelahay In aan idiin sheego Mashruuc ay bixiso Haayada AET (AFRICAN EDUCATION TRUST) oo Wasaarada Waxbarashada kala shaqaysa dhinac Waxbarashada kaas oo ah in Communityga lacag iska soo ururiya ee raba in ay Iskuulkooda wax ugu qabtaan in ay ugu darayaan Lacagtooda libin laabkood tusaale ahaan haddii aan rabno in aan Iskuulkeena usoo iibino Mishiinwayn oo aan hayno $1000 dollar waxa ay ku darayaan $2000 dollar taasi oo aan hore ugu gudbiyay xubno guddida Gudaha ka mid ah.

Baahiyaha Dugsigeena waxa ka mid ah in aanu lahayn

1. Electricity.

2. Lap.

3. Labrary.

4. Dayr

5. Water Tank.

6. Fence.

walow ay kala mudan yihiin xiligan la joog.

TALLO SOO JEEDIN

1.Waxa aan usoo jeedinayaa Ururka khayrka ku bahoobay ee UHWA WORLD WIDE isku duubnaan isku tanaasul iyo istixgalin,

2. Waxa kale oo aan soo jeedinayaa in la helo Guddi Qiimayn ku samaysa Macalimiinta Degmada iyo in Macalimiinta Mushaarkooda lagu saleeyo Aqoon,Khibrad, Xiisado Badnaan  IWM. Iyada oo aan anigu ka Maamul ahaan aan Ogahay in aanay hadda isku dheeli tirnayn Hawsha  iyo gunada ay Macalimiinta qaar kood qaataan oo aanay in wada qaadan Macalimiinta Dugsiga wax ka dhigta, sidaasi awgeed waa in la helaa Guddi Qiimayn ku samaysa Macalimiinta  oo lagu darsadaa Agendayaasha Sanadkan cusub.

3. Waxa kale oo aan usoo jeedinayaa Jaaliyaha In ay Qorshaha ku darsadaan Siddii Agab Waxbarasho ay usoo gaadhsiin Lahaayeen Degmada.

Waxa kale oo aan waydiinayaa Jaaliyadaha Halkuu Marayaa Qorshaheenii Saddex Sano ka hor aan bilownay ee ahaa Dugsigii Boardingka ahaa???

Ugu danbayntii waxaan Ilaahay  inooga rajaynayaa in sanadkan sanadkiisa aan ku gaadhno guul iyo horumar balaadhan,

Gabagabo.

Dugsiga sare  ee Allaybaday waxa uu daboolay baahi dhinaca waxbarashada sare ah  ee Degmada  waxaanay waalidiin fara badani kaga raysteen in ay ubadkooda la raadsadaan Dugsi sare taasi oo hore ugu kali fijirtay in ay Caruurtooda la raadsadaan Xaafad ay la joogaan ama se ay u guuri jireen waxbarashada Caruurta awgeed,halka ay qaar kalena aanay usuura galin in ay helaan waxbarasho sare.balse maanta aynu haysano Dugsi sare oo ay ardaydu bilaash wax ku barato, Amaanteedana ay iska leeyihiin cid kasta oo gacan ka gaysataa.

 

ALLAA MAHAD LEH

 

Ingeneer Maxamed Aadan Da’ud

Maamulaha Dugsiga sare ee ALLaybaday