New Page 1

Sawirka sarre: W/K: Ahmed A. Cagedable, Gudoomiye: A/asis SAMALE iyo Xubin UHWA London: Mohamed Aw Dahir.

Qado sharaf uu soo abaabulay Guddoomiyaha UHWA Somaliland Mr. Ahmed Abdi Bakaal ayaa dhamaan waxa kasoo qayb galay qaar ka mida qurba joogta, siyaasiyiinta, odayaaasha, aqoonyahanada iyo Suldaanka kasoo jeeda Degmada Allaybaday, kulankan oo ka dhacay Hotel Maansoor oo ay ujeedadiisu ahayd xogwaran wixii uu Gudoomiyaha Ahmed Abdi Bakaal uu ku soo arkay Safarkiis u dhawaan ugu baxay jaaliyadaha UHWA Norway iyo UHWA UK.. Qada sharaftii kadib waxa fadhi la iskugu tagay guriga gudoomiyaha Guud ee UHWA MR. Ahmed Abdi Bakaal taasoo uu guddomiyuhu uu aad uga mahadnaqayd dhamaanba dadkii kala duwanaa ee uu la kulmay intii uu ku jiray safarka shaqo iyo is xaal waraysi guud oo ku saabsan sidii loo midaynahaa aqoonta iyo waxqabadka Degmada Allaybaday.

Gudoomiyuhu waxa kale oo uu xusay in loo baahan yahay in fadhiga laga kaco oo waxqabadka degmada loo qabanayo la libinlaabo.

Waxa kale oo ka hadlay Dr. Mohamed Aw Daahir oo aad u xusay ama dhaliilo kazoo jeediyey meelo fara badan iyo isku xidhnaan la’aanta xaga waxqabadka ee degmada oo aynu meelo fara badan aynu kala mid nahay dhamaanba reer Somaliland sida mushaar la’aanta macalimiinta xaga dawlada, dhamaanba qaab dhismeed la’aanta xaga waxbarshada ee degmada (in terms of government structure), macalin u dhiga 80 arday iwm.

UHWA dab waxbarasho ayey shiday oo baxaaya laakiin sidii la doonayey loogama faa’iidaysanayo xaga bulshadeena ama dadkeenaba oo waxa weeyaan in gudaha abaabul dhaqaale oo adag laga sameeyo ayey ahayd. Waxa jirta dhibaato xaga waxbixinta ah marka tusaale ahaan London oo kale lagasoo ururinayo $ 10 doolar way adag tahay sida ay dadku ku bixinayaan, waxa haboon in dhaqaale ururin gudaha ah lasameeyo oo aan dibada uun wax lagu halayn sida:-

Waxa kale oo isna ka hadlay Wasiirka oo tilmaamay in lagaga hadlo waqabadka Degmada Allaybaday shirka wasiirada Jamhuriyada Somaliland oo ay ka hadleena Wasiirka Waxbarashada, Wasiirka Qorshaynta, Wasiirka Beeraha oo aynu manta tusaale u nahay dhamaan degmooyinka kale oo la yidhaa waar bal sida Degmada Allaybaday oo kale wax u qabsada oo maanta khudrada ka soo baxda Degmada Allaybaday loo raro meel kasta oo Somaliland ah iyo wadamada aynu jaarka nahay sida:- Ethiopia, Djibouti.

Waxa uu wasiirku hadalkiisii kusoo gabagabeeyey “wixii inaga dhiman inaga oo gacmaha is haysana aynu ka codsano kolba ciddii ay khusayso”.

Waxaan isna hadalo dardaaran ka soo jeediyay Gudoomiyaha ku xigeen kowaad ee Golaha wakiilada Somaliland. Mudane A/Asis Mohamed Samaale.

Waxa kale oo isna hadlay Aw Abdilaahi oo dhinacyo farabadan ka hadlay sida waxbarshada, xaalada dadka Degmada Allaybaday kana jawaabay sababaha ay ku timid in aan xaga tacliinta loo dadaalin mudooyinkii hore kadibna ku booriyey kazoo qayb galayaashii shirka:

Waxa kale oo isna kahadlay Cali Hassan (Cali Gobanimo) oo mahad dheer u soo jeediyey guddida UHWA guddo iyo dibadba iyo sida ay hawsha u wadaan waxa kale oo uu dhaliil u soo jeediyey abuuritaan la’aanta sanduuq dhaqaale oo gudaha ah taasoo ay marar badan ay isla soo qaadeen guddidii hore ee UHWA Somaliland.

Waxa kale oo isna ka hadlay jaamac Daa’uud oo dhinacyo badan ka hadlay siiba xaga waxbarshada iyo baahiyaha faraha badan ee guud ahaan xaga degmada jira.

Waxa kale oo iyaguna halkaa ka hadlay oo uga waramay kasoo qaybgalaayasha kulanka Guddida UHWA Somaliland Ismail Abdi Yonis, Dayib Mohumed Odowaa iyo Cabdilaahi Mohumed (Huuno)oo kawaramay halka ay waxbarashada Degmadu marayso iyo waxa ilaa hada qabsoomay sida dhismayaasha iyo buugaagta dugsiyada iyo guud ahaanba horumarka la gaadhay iyo waxa hawlaha ka socda iyadoo halkaa ay guddidu ka cadaysay tirada macalimiinta, ardayda, qaadhan bilow ah oo laga qaado shaqaalaha degmada ka soo jeeda ee ka shaqeeya Hay’adaha qaarkood iyo baahiyaha ka jira ee la doonayo in wax laga qabto mustaqbalka dhow iyo ka dheerba loona baahan yahay in guntiga dhiisha la iskaga dhigo oo wada jir wax loo qabto.

Suldaan Ahmed/Nuur ayaa soo gabo gabeeyey isagoo ku bilaabay “Oodo dhacameed siday u kala sareeyaan ayaa loo kala guraa”.

Jaaliyadaha UHWA ee dibada iyo UHWA Somaliland mahad balaadhan ayaan u soo jeedinayaa oo xilkoodii ayey kasoo baxeen, Allaybaday ilaa Ethiopiyana waa lamid oo wixii tacliin lahaa way ka yimaadeen waxna way qabsadeen. Dhaliisha ugu wayni waa dadka reer Hargeysa laga bilaabo aniga oo halkani waa halkii aynu ugu badan nahay dhaliishiina halkanay taalaa cid walbana ha ahaatee, baahiduna meel walba way taalaa ee arin aynu helno, wado malihin, guryo kuma lehin, qoladii miinadu (Halo Trust) way baxeen oo Sahan (survey) ayey ka sameynayaan Degmada oo waxay ka bilaabeen Carro yaambo iyo Arabsiyo.

Waxa uu suldaanku hadalkiisa kusoo gabo gabeeyey “Reer hargeysow sedan aynu wax ka badalno oo aynu nimcada aragno oo talo aynu iskula noqono” oo bal aynu Khamiis kasta isku nimaadno Kulan laga arinsanaayo Horemarinta Degmada, kaas oo ay ka soo qaybgalayaa dhamaan siyaasiyiinta iyo aqoonyanada Degmada ayuu hadalkiis ku soo gabagabeeyay Suldaanka Guud ee Degmada Allaybaday, Suldan Ahmed Nuur A/Lahi Samaale.

Maxaa ka taqaana ururka UHWA:

- Ururka UHWA (Ururka Horemarinta Waxbarashada ASAASIGA/ALLAYBADAY) oo la aasaasay dabayaaqadii 2004 ta, waxaa la mid ah ururkan 18 Jaaliyadood. Waxaana ka Waxa uu gacanta ku hayaa 11 Dugsi oo ku yaala degmada Allaybaday ee Gobolka Hargeisa. Sannadkii 2005 wuxuu ugu deeqday waxbarashada Degmada lacag dhan $ 7,000 oo dollar, Sannadkii 2006 kii lacag dhan $ 15 625. Sannadkii 2007 lacag dhan $ 38,615. oo dollar, waxa kale oo dhisay 4 Dugsi oo uu ku jira Dugsiga sarre qaybta hore. Sannadkan hada lagu jira ee 2008 waxa uu gacanta ku hayaa dhismaha Dugsi Sarre oo Boarding ah oo loo dhisaayo Degmada oo ku kacaa lacag dhan $ 120,000 oo dollar.

Degmada Allaybaday waxay ku taalaa qiyaastii 80 KM koonfur galbeed ee caasimadda Jamhuuriyada Somaliland ee Hargeisa. Degmada Allaybaday waxay caan ku tahay harooyin ama balayo ugu waaweyn Somaliland oo dhan, kuwaas ay u isticmasho dhinaca beeraha. Waxaa ku yaala togag waawayn oo ay biyuhu ku rogmadaan xiliyada gu’ga iyo dayrta. Degmada Allaybday waxaa Degmo loo aqoonsaday sanadkii 2002. Bulsho weyn Degmada Allaybaday waxay jihaad weyn ugu jiraa sidii Degmadu u helli lahay waxyaabaha u aasaasiga ah nolosha dadweynaha ku nool Degmada.sida waxbarashada, caafimaadka, isgaadhsiinta, shaqo-abuuris iyo Biyaha. Degmada Allaybaday waxaa hoos yimaado ugu yaraan 20 tuulo oo aad ugala fogfog.

	Ururka Horemarinta Waxbarashada Degmada Allaybaday "Ilayska Waxbarashada ee Baxaya Dhankaaga Ka iftiimi"